బెలగాం కథలు
పుస్తక పరిచయ కార్యక్రమం
ఓలేటి శ్రీనివాస భాను
అంటేనే , నిలువెత్తు భావుకత.
తీయందనాల తెలుగు పదాల
పోహళింపు.
భాను పేరు చెబితేనే
పొగబండి కథలు… కథా
సంపుటం మదిలో మెరుపులా మెరుస్తుంది. వెనుకటి రోజులలో నల్లని పొగలు చిమ్మే రైలు
ప్రయాణంలా ఎన్నో పాత ముచ్చట్లను మదిలో మేలు కొలుపుతుంది. జీవన మాధుర్యం
తెలియజేస్తుంది.
కలకండ పలుకులు
చవులూరిస్తాయి.
ఇక, ఎల్వీ
ప్రసాద్, పుల్లయ్య గార్ల జీవిత చరిత్రలు కళ్ళ ముందు కదలాడుతాయి.
శ్రీ కుల శేఖర
ఆల్వారుల కృతికి అను సృజన -
ముకుంద మాలను గేయ రూపంలో గుండెలకు చేరువ చేసిన ధన్యుడు..
భాను విరామ మెరుగని
కలం యోద్ధ. చేపట్టని సాహితీ ప్రక్రియ లేదు. అటు
పత్రికా రంగం, ఇటు మీడియా... ఎనలేని విలువైన రచనలు వెలువరిస్తున్న చిర పరిచితుడు.
ఇప్పుడు …బెలగాం కథలు.
పుట్టి పెరిగిన ఊరి
కథలు. బాల్యం లోని తీపి గుర్తులను చవులూరిస్తూ
చెప్పే కథలు. మనసు ప్రఫుల్లం చేసే కథలు. మన బాల్యాన్ని మనకు తిరిగిచ్చే కథలు. ఒక నాటి సమాజ చిత్రాన్ని రూపు కట్టిన కథలు. మనమెరిగిన
మన జీవిత చిత్రాలను మరోమారు ఎరుక పరిచే కథలు. జీవితాంతం వెంటాడే కథలు. అలరించే
కథలు. అపురూప రత్నాలు. బంగారానికి సుగంధం అబ్బినట్టు బెలగాం కథలకి జీవకళ ట్టి పడే బాలి గారి
బొమ్మలు.
సాహితీ లహరి బెలగాం లోనే బెలగాం కథలని పరిచయం చేసే
కార్య క్రమం –పుట్టినింట
పెద్ద పండుగ చేసుకుంటున్నట్టుగా ఉంది. ఆత్మీయంగా పలకరించి నట్టుగానూ, పెద్ద మనసుతో
ఆశీర్వదించినట్టుగానూ ఉంది.
భానుతో నా పరిచయం
ఇప్పటిది కాదు. మా కథా ప్రస్థానం మన ఊర్లోనే జరిగింది.
మా జగన్నాథ శర్మా,
భానూ ఆ పరిమళాలను భాగ్య నగరం వరకూ తీసికెళ్ళి వెదజల్లారు.
మన ఊరి ఖ్యాతిని
ఇనుమడింప చేసారు.
మన పార్వతీపురం రైల్వే
ప్లాట్ ఫారమ్ మీద గంటల తరబడి చెప్పుకున్న కథల ఊసులు భాగ్య నగరంలో
ప్రతిధ్వనించాయి. మా చిన్ననాటి కలలని
సాకారం చేసాయి....
ఈ చక్కని కార్యక్రమంలో
నేను ఆరోగ్యం సహకరించక పాల్గొన లేక పోతున్నదుకు బాధ పడుతున్నాను .
మన ఊరి వాడిని, మన
కథలను అక్కున చేర్చుకోడం అంటే, మనని మనం పలకరించు కోవడం. మనని మనం గౌరవించుకోవడం. ఈ
కార్యక్రమంలో సత్కారం స్వీకరిస్తున్న సాహిత్య అకాడెమీ పురస్కార గ్రహీత బెలగాం భీమేశ్వర రావు గారికీ, నూతలసాటి సాహితీ సత్కార
గ్రహీత సిరికి స్వామి నాయుడు గారికీ కూడా అభినందనలు.
ఇంత మంచి కార్య
క్రమాన్ని నిర్వహిస్తున్న మీ అందరికీ నా నమోవాకాలు
శలవ్
.
కామెంట్లు లేవు:
కామెంట్ను పోస్ట్ చేయండి